Colombia-a FARC helten inkahhai puang

Colombia helpawl, Fuerzas Armadas Revolucionarias de Colombia (FARC) chuan sorkar nena inremna an ziah hnuah tiamchin awm loin inkahhai an puang tih an sawi.

FARC-te hi kum 1964 aṭang khan Colombia sorkar lakah an hel tawh a, kum 50 chuang zet sorkar nena an inbeih chhung hian mi tam takin an thih phah bakah, mi nuai tel chu hmun him lamah an tlanchhiat a ngaih phah a ni.

Colombia sorkar leh FARC hel aiawhte hian inremna kawng zawnga kum li zet inbiakna an neih hnuah, kar kalta khan Cuba khawpui, Havana-ah inremna an siam thei ta a ni. Inremna hi kar reilote hnuah tihfel vek a ni tawh ang.

FARC hruaitu Ro≠drigo Londono, Timoleon Jimenez emaw, Timochenko emaw tia sawi ṭhin chuan an pawl member-te chu inkahhai hi an puan thu hi a sawi a, "Indona avangin tu nu leh pa mahin an fapa leh fanute an chan tawh lo ang" tiin, sorkar nena an inkara inhriatthiam lohna leh inbeihan awmte chu thil hlui an ni vek tawh a ni, a ti.

Colombia President Juan Manuel Santo pawhin FARC nena inremna an siam thei ta chu lawmawm a tih thu saiwin, an ram hun tawn zinga hrehawm ber zinga mi chu a tawp ta a ni, a ti.