Gaza-ah chhawmdawlna phurtu truck 10,000 chuang lut tawh

United Nations humanitarian agency chuan January 19, 2025-a Gaza Strip-a Israel leh Hamas ten inkahhai an puan hnuah chhawmdawlna chi hrang hrang phurtu truck 10,000 chuang Gaza-ah an lut tawh tih a sawi.

UN-a Office for the Coordination of Humanitarian Affairs (OCHA) hotu, Tom Fletcher chuan kar hnih chhungin truck 10,000 chuang an luhtir thei a,amah ngei pawh chhawmdawlna phurtute rualin Gaza hmarlam kal a tum tih a sawi. Gaza Strip-a chengte mamawh chi hrang hrang - ei leh in tur, damdawi leh thil dangte thawn luh a nih theihna atana hma la tur zawng zawngte chungah lawmthu a sawi nghal bawk.

UN chuan Gaza Strip-a cheng mi maktaduai chuang hnenah ei tur leh an mamawh dangte sem a ni tawh tih a sawi. Hemi rual hian mipuite hian harsatna an tawh nasat avangin kawng hrang hranga chhawmdawl leh puih an la ngai nasa hle tih a tarlang. Ei tur ringawt pawh hi inkahhai puan hnuah metric ton mtd 10 chuang thawn luh a ni tawh.

Israel leh Hamas hian January 19 aṭang khan inkahhai hi an kalpui ṭan a, a thawh khatna hian ni 48 a awh dawn a ni. Inremna an siam angin inkahhai puan hnuah Hamas lamin an mi hren 18 chhuah tawhin, Israel pawhin an rama jail-a Palestinian tang zinga mi 600 an chhuah tawh bawk a ni. OCHA chuan Hamas hian mi 79 an la hreng mek a, an zinga pahnih chu thi tawhin an ruang hi an hreng niin a sawi.

OCHA chuan inkahhai puan a nih hnuah, indona avanga tlanchhia mi nuai 50 chuang chu Gaza hmarlamah an kir tawh tih a sawi. Hetih lai hian an in leh lote a chhiat nasat avangin heng mite hian ei tur, tui thianghlim, damdawi leh puan in te an mamawh hle tih a tarlang bawk. Gaza aṭang hian damlo leh hliam tuar mi 100 chuang chu Egypt lamah kalpui a ni tawh a, damdawi-inte tih changtlunna turin ambulance panga pawh thawn luh an ni tawh tih an tarlang. Emergency medical team 25-ten hna thawkin, an zinga 22 hi chhim lam leh a lailai laiah an awm a, Gaza city-ah pahnih leh hmarlamah pakhat an awm.

Gaza Strip-a Health Ministry chuan indona avanga thi hi mi 47,583 an tling tawh niin Ningani khan a sawi. In chim leh chhia hnuaiah ruang hmuh belh an la awm reng a, hliam tuar zingah thi an awm belh reng bawk niin a sawi.