Netanyahu-a'n Trump hnenah golden pager a pe

Israel prime minister Benjamin Netanyahu chuan Washignton-a US president Donald Trump nen an inkawm ṭumin thilpek atan golden pager pein, he pager-ah hian “Press with both hands” tih a inziak lang. Trump hian an thlalak dunna pe ve bawkin, 'To Bibi, A great leader!' tiin a ziak.

Nikum September thlaa Israel-in Lebanon helpawl, Hezbollah lakah beihpui an thlakna pakhatah khan helpawlin inbiakpawhna atana an hman, an pager leh walkie-talkie hmanlai tam tak an lo tih puah sak a ni. President Trump hian Israel PM hnen aṭanga thilpek a dawn hian "Beihpui thlakna pui tak a ni," tiin a lo sawi.

Israel hian September 17, 2024 khan Hezbollah member-ten hman, pager tam tak a tih puah sak a, hei vang hian mi 37 an thi a, hliam tuar 3,000 dawn an awm bawk. A tukah walkie-talkie tam tak a tih puah sak leh bawk. Thla hnih hnuah Netanyahu hian Hezbollah-te pager bei tur hian thu a pek thu a sawi. Israel intelligence agency, Mossad chuan a hma daihin Hezbollah-ten pager an order chhungah hian khawl dang, an duh hunah tih puah sak theihnatur an lo phumru tih tarlan a ni.

PM Netanyahu hi Donald Trump-a'n US President term hnihna a chelh hnuah ram dang hruaitu, zin tura a sawm hmasak ber a ni. White House-a an inkawmnaah hruaitu pahnihte hi inkawmin, a hnuah joint press conference an nei zui a ni.