Israel leh Hamas-ten tang inthleng tawn leh

Israel leh Hamas chuan inremna an siam angin an mi man leh hrente an chhuah zel a, Inrinni liam ta khan Hamas chuan an mi hren mi pathum chhuahin, an zingah hian ni 491 chhung an hren tawh Eli Sharabi a tel. Israel hian Palestinian mi 183 an chhuah ve bawk.

Eli Sharabi hi October 7, 2023-a Hamas ten Israel an beih ṭuma an man zingah khan a tel a, Gaza-ah an hreng zui a ni. Hamas-te hian a nupui leh fanu pahnihte an thah sak bawk, mahse Sharabi hian an chanchin engmah a hre zui lo a, Inrinnia chhuah a nih pawh hian a nupui fanaute kianga a kir leh thei tur chu a hlim thute a sawi a ni. Mahse a nupui leh fanaute chanchin hi hrilh a ni a, a unaupa pawh Hamas hoin an hren laiin a thi a, a ruang pawh Gaza-ah hren mek a la ni tih hrilh a ni.

Hamas-in mi pathum an chhuahte hi Israel civil mi vek an ni a, Red Cross hnenah an hlan tura an rawn hruaichhuah hian an mi mante hi an cherin an taksa a chak loh hmel hlawm hle. Hei vang hian enkawl an nih danah Hamas sawiselna leh demna pawh a tam phah hle.

January 19-a Gaza Strip-a inkahhai hman ṭan a nih aṭang khan Hamas hian an mi hren mi 21 an chhuah tawh a, Israel-in an ram jail hrang hranga Palestinian mi tang zinga 566 an chhuah tawh bawk. Inremna thawh khatna, ni 42 hman chhung hian Hamas hian mi 33 leh Israel-in mi 1,900 an chhuah beisei a ni.

Gaza corridor aṭangin Isarel sipai inhnuhdawk ṭan

Israel chuan inremna an siam angin, nimin aṭang khan Gaza corridor pawimawh aṭangin Israel sipaite an inhnukdawk ṭan tih a sawi.

Gaza Strip-a inkahhai puang tura inremna an siamah, Israel hian Gaza chhim lam leh hmar lam inṭhenna, Netzarim corridor aṭanga a sipaite lak chhuah a remti tel a ni. Inkahhai hman ṭan a nih aṭang khan Israel chuan indona avanga hmun danga tlanchhia, Gaza hmarlam mite chu he corridor kaltlang hian an khaw lamah an kir a phalsak tawh a ni.

Nimin aṭang khan Israel sipaite hi lak chhuah ṭan nia sawi mah se eng zat chiah nge lak chhuah an nih erawh sawichian a ni lo.