Indona hmatawngah NKorea sipaite dah an ni : Ukraine President

Ukraine president Volodymyr Zelensky chuan Russia khawthlang lam, Kursk bialah indona hmatawngah North Korea sipaite dah an ni leh tih a sawi. North Korea sipaite hi indonaah thi an tam avangin thla hmasa khan indona hmun aṭang hian hnuhkir nia sawi an ni.

Mahse President Zelenskyy chuan a thusawina video a tih chhuah tharah, Russia sipaite chuan North Korea sipaite hi rawn hruai kir lehin, Ukraine-in a awp ṭhen, Kursk biala indona hmatawngah an dah leh tawh a ni, a ti.

Russia sipaite pui turin North Korea sipai 11,000 vel tirh an ni tih khawthlang ram official-te chuan an sawi a, heng zinga 1,000 vel chu thla thum chhungin indonaah an thi tih an sawi bawk. Mahse hemi chungchangah hian NKorea leh Russia chuan sawi an nei lo thung.

Russia hian Ukraine nena an indonaah an sipai thi zat hi kum 2022, September thla thleng khan 5,937 an tling tih a sawi a, hemi hnu lamah erawh thi zat hi a puangzar tawh ngai lo. Mahse Ukraine President chuan Russia sipai thi zat hi nuai 3.5 vel an tling tawh niin kar liam ta khan a sawi a, report ṭhenkhat chuan hei ai hian an tam niin an tarlang bawk. Zelenskyy-a'n Ukraine sipai thi zat 45,100 tih a sawi chu military expert lam pawhin an awih bik lo a, hei aia tam fe hi an thia rin a ni.