Bangladesh-in Operation Devil Hunt nei mi 1,000 chuang man an ni tawh

Bangladesh sorkar chuan Dhaka khaw dai, Gazipur-a Awami League hruaitu, minister hlui AKM Mozammel Haque chenna in bula inbeihna thleng leh, zirlai eng emaw zatin hliam an tawrh avangin Inrinni aṭang khan pawikhawihtute dap chhuah hna thawkin 'Operation Devil Hunt' a nei a, mi 1,308 man an ni tawh.

Chief adviser, professor Muhammad Yunus kaihhruai Bangladesh sorkar lailawk chuan chuan pawikhawihtute man chhuah vek an ni hma chu beihpui thlak hna hi kalpui a ni dawn tih a sawi. Yunus chuan dan leh thupek khauh taka kenkawh a nih tur thu saiwin, Awami League hruaitu chhungte leh an in leh lo beih ṭhin pawh ti tawp turin a ti bawk.

Chief adviser press secretary, Shafiqul Alam chuan buaina chhuak zel tur veng a, dan leh thupek khauh zawka kenkawh a nih theihna turin command centre din a ni dawn tih a sawi. Command centre-ah hian law enforcement agency leh armed ofrce aiawhte an awm dawn a ni.

Prime minister hlui, Bangladesh Nationalist Party (BNP) hotu Khaleda Zia chuan Bangladesh sorkar chu 'mob culture' ti tawp tura ha la turin a phut a, an rama dan leh thupek dinhmun chhe zel duh lohna leh, inthlan buatsaih thuai phutna lantirin vawiin aṭang hian ram pum huapa rally huaihawt chhoh an tum tih a sawi.

Zirtawpni liam ta zan khan Dhaka khaw dai, Gazipur-a Dakshinkhan area-a Haque chenna in beih a ni a, mipui kalkhawmte hi Awami League worker leh helai biala chengte an lo bei let niin niin an sawi. Inbeihna thlenga zirlai hliam tuar mi 15 chu damdawi-inah dah luh an ni a, home affairs adviser Lt Gen (retd) Md Jahangir Alam Chowdhurty chuan damdawi-ina awmte hi tlawhin, kutthlaktute man chhuah a tiam. Gazipur-a buaina chhuakah hian Awami League activist 81 man an ni tih thuneitute chuan an sawi.

Bangladesh-a buaina chhuak thar hi kar liam Nilaini zana prime minister aṭanga paihthlak, Awamni League hruaitu Sheikh Hasina-in an parry Facebook account kaltlanga online-a thu a sawi hnua chhuak a ni a, Hasina hian anmahni dodaltute chungah phuba lak a la ni ngei dawn niin a sawi. An ram mipuite chu tuna sorkar ding mek dodal tura a chah bawk.

Zirlai pawlin Hasina kaihhruai sorkar policy duh lohna lantira nawrh an huaihawtna kal zelah, kum 2024 August thla khan Hasina hi Bangladesh aṭanga tlanchhiain, India-ah a awm mek a ni.

Hasina thusawi hnu hian Dakha leh khawpui dangah mipui lungawi lote che chhuak zuiin, PM paihthlak leh a thawhpuite inte an bei zui a ni. Nilaini aṭang khan ram chhunga district 35-ah inbeihna hi ṭum 70 vel a thleng tawh nia sawi a ni. Mipui thinrim hian Sheikh Hasina pa, Bangladesh founding leader Sheikh Mujibur Rahman in, Dhaka-a mi 32 Dhanmondi chu an hal bawk. Movement hruaitute hian Awami League chu political party anga ziah luh a nihna ti tawp turin an phut a,nikum July-August-a nawrh huaihawt zirlaite chunga rawng taka chetna thleng chungchangah Hasina leh a thawhpuite chungthu ngaihtuah an phut bawk.