Britain MP-in London-a 'Bengali' signboard tar a duh lo

Britain-a Great Yarmouth MP, Rupert Lowe chuan London-a Whitechapel rel station-a signboard, Bengali ṭawnga inziak tar chu a duh loh thu sawiin, signboard chu English chauha ziah a phut.

Lowe hian a official X account-ah hei hi post-in, Whitechapel station-a English leh Bengali ṭawnga signboard an tar thlalak pawh a dah lang bawk. "Hei hi London a nih hi, station hming chu English chauha ziah tur a ni," a ti.

X-a thil post hi thlawptu tam tak an awm a, hetih lai hian ṭawng chi hniha tar pawh a pawi lo tia sawi pawh an awm ve bawk. X neitu, Elon Musk pawhin Lowe hi a thlawp thu a lo sawi ve bawk a ni.

Whitechapel station awmna bial hi UK-a Bangladesh awm tamna bial a ni. Bengali signboard hi kum 2022 khan Eaast London tana Bangladesh mite thawh hlawkna hriatrengna puala tar a ni.

Hetih lai hian England-ah ram dang aṭanga pem lut an tam avangin rel station eng emaw zatah ṭawng chi hniha signboard tarna dang pawh a awm. London khawthlang lam, Southall station pawh Punjabi ṭawnga ziah tel a ni. Southall-a cheng zinga a zahve vel chu Punjabi nia sawi a ni. Gloucestershire-a Moreton-in-Marsh rel station-ah singboard eng emaw zatah English leh Japanese a ziah a ni bawk.