Bangladesh SC-in Islam hruaitu ngenna hnawl

Bangladesh Supreme Court chuan kum 1971 Liberation War laia pawikhawihna lian tak thlentua puha thiam loh chantir, Jamaat-e-Islami hruaitu Mir Quasem Ali-a hnena thi tura hremna a lo pek tawh chu kenkawh a ni dawn tih a sawi.

Supreme Court-in thi tura hremna a pek hi ngaihtuah ṭha leh turin Ali hian a ngen a, a ngenna hi Chief Justice Surendr Kumar Sinah kaihhruai, member panga awmna bench chuan a ngaihtuah hnuah a hnawlsak a ni.

Mir Quasem Ali hi Pakistan laka Bangladesh independence dodaltu, Jamaat-e-Islami pawl hotu leh sum lama puitu ber nia ngaih a ni.

Ali-a ngenna hnawlsak a nih thu sawiin, attorney general Mahbubey Alam chuan Ali hian tihhlum a nihna tur laka him tur chuan President laka zahngaihna dil chauh a ti thei tawh tih a sawi. President hnena zahngaihna lantir tura a dil lo emaw, a dilna hnawlsak a nih emaw chuan eng hunah pawh tihhlumna hmunah thawn theih a ni tawh dawn a ni, a ti.

Kum 1971-a Liberation War lai khan Pakistan sipai leh Bangladesh-a an thurualpuite chuan mi maktaduai thum vel an suat hman nia sawi a ni, Ali hi mi tam tak nghaisa a, sawisa hlumtu Al Badr cell siamtuah puh a ni a, kum 2014 November thla khan thiam loh chantir a ni. Kum 2013 aṭang khan indo laia pawikhawihna thlen tira puha thiam loh chantir, Islamist hruaitu pali chu khaihlum an lo ni tawh bawk.