Raltlan 6,500 chhanchhuak

Italian coastguard-te chuan Thawhṭanni khan Libya tuipui aṭangin raltlan 6,500 vel an chhanchhuak tih an sawi.

Raltlan tam zawk hi Eritrea leh Somalia aṭanga kal an ni a, chhanchhuahna lawng hmangin Libya-a Sabratha khua aṭanga km 20 vela hla tuipuiah chhanchhuah an ni. Hemi hmunah vek hian Pathianni khan mi 1,100 vel chhanchhuah an lo ni tawh bawk.

Thawhṭannia raltlante chhanchhuah hna hi Italian coastguard-te bakah EU border agency leh NGO Proactiva Open Arms leh Medicins Sans Frontieres (MSF)-te'n an thawk.

Nikum chhung khan mi maktaduai khat chuang chu Europe ramah an tlanchhia a, an zinga a tam zawk hi Syria tualchhung indona tlanchhiatsante an ni. Mahse raltlante hi an pun chak avang leh, an awmna tur ngaihtuahsakna kawngah harsatna a awm chhoh tak avangin Europe ram hrang hrangten an buaizui phah hle a, hma lak dan turte pawh an lo ngaihtuah fo tawh a ni.

March thla khan EU leh Turkey chuan Turkey aṭanga Greece rama raltlan leh pem luh tumte danna turin inremna an siam a, Balkan ramte chuan an ramrite an khar bawk. Mahse hemi hnuah hian Africa ram, Eritrea, Somalia leh Africa khawthlang ram aṭanga hian Libya kaltlangin Italy-ah mi tam tak an la lut zui reng a ni. A tam zawk chu tualchhung indona vanga tlanchhia an nih laiin, eng emaw zat chuan dinhmun leh eizawnna ṭha zawk beiseiin Europe ram hi an pan a ni.

International Organization for Migration (IOM) chuan kumin chhungin Italy ramah mi 106,000 an lut tawh a, lut tuma kal zinga mi 2,726 chu kawng laka an chetsualnaah an thi tawh bawk niin a tarlang. IOM chuan Libya aṭanga Italy luh tum hi mi 275,000 vel an la awm mek bawk niin a sawi.