Yemen-ah IS bomb tihpuahah mi 71 thi

Yemen-a Aden khawpuiah Thawhṭanni khan Islamic State (IS) firfiak pakhat chuan a bomb phurhna motor chu Army recruiting centre-ah tlan luhpuiiin a tipuak a, mi 71 an thi.

Yemen sipaite hian Saudi Arabia kaihhruai Arab ṭangrual ramte puihnain Aden-ah hian Shia Houthi hel leh helpawl dangte laka beihpui an thlak zawm thei turin sipai ṭang tharte chu training an pe ṭhin a ni.

Tualchhung buaina nasa tak a chhuah hnuah, Yemen ramah hian sorkar pahnih, Houthi hel kaihhruai sorkar leh khawvelin a pawmpui sorkar te an ding mek a, ramdangte an pawmpui sorkar hian Aden hi hmunpuiah a hmang a ni.

Houthi helte bei tura sorkarin training a pekna hmuna hian sipai lak thar 5,000 vel an awm mek a, he complex hi pawn lam mite tlawhpawh phal loh ni mah se, centre beitu firfiak hi bungrua phurhluh tur awm vanga gate an hawn lai takin compound chhungah hian a tlan lut a ni. Bomb na tak puak vang hian mi 71 an thih bakah mi dang 98 in hliam an tuar bawk.