NKorea-in anti-aircraft gun hmangin official pahnih kaphlum

North Korea ram hotu lu ber, Kim Jong-un chuan senior bureaucrat pahnih chu anti-aircraft gun hmanga tihlum turin thu a pe a, official pahnihte hi tihhlum nghal an ni.

South Korea-a JoongAng Ilbo chanchinbu chuan official tihhlum zinga pakhat zawt hi Ri Yong-ji, education ministry official a ni tih a sawi a, Kim Jong-un hoa meeting neih laia a mutthluk avangin Kim hi a chungah a thinrim hle niin a sawi. Meeting-na hmunah Ri Yong-jin hi man nghal a ni a, state security ministry-te'n thu zawtfiahin, thubuai hrang hrang an siamsak hnuah an kaphlum a ni. Thubuai an siamsak zingah hian eirua puhna leh, an ram hotu lu ber zahloha puhna te pawh a tel.

Official pahnihna hi Hwang Min, agriculture ministry official hlui a ni a, tihhlum a nihna chhan hi policy kalpui tura a rawtnate chu an ram hotu lu ber, Kim Jong-un policy dodalna lam hawi a nih vang nia sawi a ni bawk. Hwang Min-a policy kimchang hi puanzar a ni lo a, mahse June thla khan Parliament meeting neih ṭumin a post hi thlaksak a ni tawh bawk.

Offiical pahnihte hi NKorea khawpui, Pyongyang-a military academy-ah anti-aircraft gun hmangin kahhlum an ni.

Nikum khan defence minister Hyong Yong Choi chu ram phatsana puhin tihlum a lo ni tawh bawk.