Singapore-a zin lo turin hriattir

Australia, Taiwan leh South Korea sorkar chuan Singapore-ah Zika virus vei mi 50 chuang hmuhchhuah an ni tawh avangin nu, naupai lai leh naupai tumte chu Singapore-ah zin lo turin a hriattir.

Singapore-a Zika virus vei finfiah tawh mi 56 zingah hmeichhia chu pakhat chauh a la awm.

Taiwan, Australia leh South Korea ramte chuan naupai laite leh pai tumte chu Singapore tlawh rih lo tura an hriattir bakah, Singapore aṭanga an haw hnunah pawh thla hnih hma chuan nau pai lo turin an hriattir. Virus hmuh ṭanna Brazil ramah chuan naupiang 1,800 chuang chu microcephaly niin, pianphung pangngai aiin an lu leh thluak a te a, hengte hi nuin nau a pai laia Zika virus a vei avanga thleng nia ngaih a ni. Hei vang hian naupai lai tan he hri vei hian nghawng ṭha lo tak a thlen thei a ni.

Singapore ṭhenawm hnai, Malayasia leh Indonesia pawhin airport leh border checkpoint-ah uluk zawka invehimna tur hi an kalpui tur thu sawiin, thermal scanner-te an dah vek dawn tih an sawi.

Hetihlai hian Singapore Tourism Board chuan an rama Zika virus vei hmuhchhuahte dinhmun chu uluk taka thlithlai reng a nih thu sawiin, khawpui chu zin veivakte tan pawh tlawh turin a him tawk a ni, an ti.

Singapore-a Changi airport hi kumtinin khualzin maktaduai 55 velin an paltlang a, kumin kum chanve hmalam khan khualzin maktaduai 8.2 an thleng tawh a, nikum lam aiin khualzin lut hi an pung nasa hle.