Jordan-in Gaza-a naupang damlo 2,000 lak luh remti

Jordan lal, King Abdullah II chuan Thawhlehnia US president Donald Trump nen an inkawmnaah, Gaza Strip-a naupang damlo 2,000 te chu an rama enkawl tura lak luh a remtih thu a hrilh.

US President Trump hian Gaza Strip-a Palestinian chengte chu Jordan leh Egypt rama sawn chhuah vek a, Gaza chu US kuta awmtir a lo rawt tawh a, mahse he a rawtna hi ram pahnihte bakah Arab ram hrang hrangte chuan an pawm lo.

King Abdullah chuan Trump rawtna siam chungchangah hma lak pui dan tur an ngaihtuah tih a sawi a, Gaza-a naupang damlo, cancer natna vei enkawl ngai 2,000 te chu an ramah an lak luh theih tur thu hi a sawi a ni. Trump pawhin King Abdullah thusawi chu lawmawm a tih thu a sawi ve bawk.

Egypt president Abdel Fattah al-Sisi pawhin kartawp lam hian White House-ah President Trump hi a hmu ve dawn bawk. Gaza Strip-a aṭanga Palestinian mite chhuahtir kher loa a dinthar hna hi kalpui turin a lo nawr tawh a ni.