Israel PM hnenah Covid-19 vaccine pe
Israel prime minister Benjamin Netanyahu chu kar liam ta Inrinni khan Covid-19 vaccine pek a ni a, a rual hian a health minister Yuli Edelstein pawh vaccine hi pek ve nghal a ni.
Israel chuan Pfizer/BioNTech vaccine chu mipuite hnenah a semchhuak tawh dawn a, vaccine semchhuah bul ṭanna atan PM leh Health Minister hi pek hmasak an ni. Tel Aviv bul, Ramat Gan-a Sbeba Medical Center-ah vaccine hi an dawng a, an vaccine lak lai hi TV-ah live-in tihchhuah a ni.
Netanyahu chuan Health Minister nen hian vaccine pe hmasa tura an ngen thu sawiin, hei hi mipui hnenah Covid-19 vaccine chu lak hlauthawng lo tura an fuihna leh, vaccine la ṭheuh tura mipuite an fuihna atana ti an nih thu a sawi. Netanyahu leh Edelstein hian kar thum hnuah a ṭum hnihna atan jection hi an lak leh a ngai ang.
Nimin aṭang khan Pfizer/BioNTech vaccine hi israel rama hospital leh vaccination centre 10-ah pek chhuak ṭan niin, healthcare worker-te pek hmasak an ni. Tun kar chhungin mipui nawlpui, kum 60 chung lamte hnenah pek chhunzawm tum a ni bawk.
Kar liam taah khan vaccine dose ṭhahnem tham tak hi Israel-ah hian a thleng tawh a, ni khatah mi 60,000 vel pek theih tumin hma an la a ni. Pfizer vaccine dose maktaduai riat lei turin inremna an siam tawh a, hei bakah hian Moderna siam vaccine chu dose maktaduai ruk a lei dawn bawk a ni.
Vaccine hi Israel mipuite bakah Israel thuneihna hnuaia awm Palestinian-te pawh sem an ni dawn a, mahse Israel khua leh tuite pek hmasak an nih dawn avangin Palestinian mite chuan an la nghah rei deuh a rinawm.
US-ah mi nuai 1.2 in vaccine la tawh
US-ah pawh vaccination programme kalpui a nih hnuah, kar liam ta chhung khan state hrang hrangah mi 1,28,000 chuangin vaccine hi an la tawh a ni.
Khawvel ram hrang hrang zinga Covid-19 hri kai leh thihpui tamna ber, US-ah hian vaccine sem thawh khatna hi mi maktaduai 2.9 te hnenah pek hman beisei a ni. Pfizer/BioNTech vaccine sem mek a ni a, Moderna siam vaccine pawh pawm a nih ve leh tak avangin sem chhuah thuai beisei a ni bawk. Heng vaccine pahnihte hi mi pakhatin dose hnih zel an lak a ngai a ni.