Covid-19 chi hrang leng chungchangah WHO-in UK official-te inbiakna neihpui

World Health Organisation (WHO) chuan United Kingdom (UK)-ah Covid-19 chi hrang, a chi thar a leng nia sawi chungchangah UK official-te inbiakna a neihpui. Report ṭhenkhatin a tarlan dan chuan, UK-a leng mek Covid-19 hri hi a tira leng nen a chi a hrang a, tuna leng mek hi a darh chak zawk a, mahse a chak lo/hlauhawm lo zawk a ni. 

Prime minister Boris Johnson leh scientist-te chuan an ram coronavirus chi thar leng hi a tir leng aiin 70% velin a darh chak a, mahse a hlauhawm lo zawk a, Covid-19 vaccine siamte pawh hemi atan hian a ṭha tel vek tih Inrinni khan an sawi. 

Hri leng hi a darh chak leh tak avang England chhim chhak lam, London khawpui pawh huamin khuahkhirhna khauh zawk hnuaiah dah leh mek an ni. Hei hi hun eng emaw chen hman a ngai dawn niin health minister Matt Hancock chuan a sawi a ni. 

UK-ah coronavirus chi hran a leng mek nia sawi a nih avangin nimin aṭang khan Netherlands chuan UK aṭanga thlawhtheihna luh a khap leh a, he khapna hian nakkum January 1 thleng a awh ang.