US Congress-in Obama veto hnawl

US President Barack Obama chuan 9/11-a firfiakten US an beih ṭuma thi chhungten, Saudi Arabia mite an khin theihna tura bill siam chu a veto hmangin a lo hnawl tawh a, mahse President veto hi US Congress chuan Nilaini khan vote lain an hnawl ve leh.

Barack Obama'n kum riat dawn US president hna a chelh tawh chhunga a veto hnawl a nih ṭum khatna a ni. President veto hi hnawl tur chuan House of Representative leh Senate-ah member hmun thuma ṭhena hmun hnihte an inthural a ngai a ni.

Kar hmasa khan President Obama hian Justice Against Sponsors of Terrorism Act (JASTA) chu a thuneihna hmang hian a lo hnawl tawh bawk a ni. Mahse US Congress chuan President veto chungchangah hian vote an la leh a, House of Representative-ah vote laknaah veto hnawl hi member 348 in thlawpin, a thlawp lo lamah vote 77 a tla. Republican party chakna, Senate-ah chuan veto hnawl duh member 97 awmin, a duh lo lamah vote khat chauh a tla.

9/11-a US beih a nih ṭuma nunna chanta chhungte puala bill siam hi member tam zawk chuan an dodal hreh a ni. Republican Senator John Cornyn chuan, "He bill hi firfiak kut tuartu, America mite dikna chanvo zahna lantirna a ni" a ti.

Congress-in President veto a hnawl chu thil zahthlak tak a nih thu White House thupuangtu, Josh Earnest chuan sawiin,"He thil hi kum 1983 hnu lama US Senate thiltih zinga zahthlak ber a ni" a ti. Kum 1983 khan Senate chuan President hlui, Ronald Reagan-a'n land bill-a veto a hman chu, vote hmangin an lo hnawl tawh bawk a ni.

9/11-a US beihnaa thi chhungte chuan Saudi Arabia lal chhungkua, Saudi bank leh charity hrang hrangte chuan firfiakte chu sum hmangain an pui ṭhin nia sawiin, US court-ah Saudi Arabia sorkar an khin theihna tur siamsak turin an lo nawr fo tawh a ni. Mahse kum 1976-a dan an lo siam tawhah chuan America court-a ram dang mite khin theih lohna dan ṭhenkhat a awm a ni.

Kum 2001, September 11-a firfiakten New York, Washington DC leh Pennsylvannia an beih ṭum khan America mi 3,000 dawn an thi a, he pawikhawihnaa a bultumtu bera puh, al-Qaida firfiak pawl hotu Osama bin Laden chu Saudi Arabia ram mi a ni.

Saudi Arabia sorkar chuan JASTA hi na takin a lo sawisel tawh a, 9/11-a US beihnaah khan inhnamhnawihna a neih loh thu a sawi. He bill hi pass a nih a, a taka hman a nih chuan an rama America thil neih, dollar tluklehdingawn za tel hu chu khawih chet theih loha dahsakah a lo vau tawh bawk.