Duterte-a'n Philippines-US war game titawp dawn

Philippines President Rodrigo Duterte chuan US nena an inthlunzawmna pawimawh tak pakhat, ram pahnih khawmual sipaiten nunchan an zirdun ṭhin chu kuminah a tawpna ber neih a ni dawn tih a sawi.

Ram pahnih sipaite hian kar leh hian Philippines-ah joint exercise hi an nei dawn a, hei hi a tawpna tur a ni tawh dawn niin Duterte chuan a sawi. Philippines President chuan US nena hun rei tak aṭang tawha security lama thawhdunna an lo neih chu a zah hle tih a sawi a, mahse Philippines-a joint drill neih ṭhin chu China-in a duh lo a, hei vang hian kum dangah neih chhunzawm a ni tawh dawn lo a ni, a ti.

US State Department thupuangtu John Kirby chuan joint exercise tihtawp chungchangah Philippines aṭangin official-a hriattirna an la hmu lo tih a sawi a, Philippines nen security lamah thawhdunna ṭha tak an nei a, hei hi chhunzawm zel an tum tih a sawi.