Chemical ralthuam hmangah Sudan sorkar puh

Sudan sorkar chu January thlaa helho nena an inbeihnaah khan tur hlauhawm tak, chemical weapon a hmang nia puh a ni a, boruak ṭha lo siam thei thil a kahchhuah avangin mi tam takin an thih phah niin Amnesty International chuan a sawi.

Tur hlauhawm tak siam thei hmanrua a kahchhuah lo hiptu mi tam tak chu thiin an luak a, thawk lamah harsatna an nei a, an vunte a inhik nia sawi a ni. Chemical ralthuam hman vanga thi zingah hian naupang pawh 200 chuang an tel a ni, a ti.

Human rights group hian thla riat chhung chu Sudan sorkar chetdan hi an chhui a, Darfur-a Jebel Marra bialah mi tam tak thah leh pawngsual an nei tih pawh hriatchhuah a nih thu a sawi. Sudan sipaiten chemical ralthuam an hmang tih hretu mi 56 pawh an hmu tawh tih sawiin, heng ralthuam hlauhawm tak hi January thlaa helho an beihnaah ṭum 30 vel an hmang niin a sawi.

Sipaiten tur hlauhawm tak an kahchhuah lo hiptute hi minute reilote hnuah thiin an luak a, an ek pawh a thi a, an mitte pawngin an mitmu rawng pawh a danglam nghal a, an vun te a inhik niin heng mite lo enkawl tawhtu pakhat chuan a sawi a ni.