Texas-in college classroom-ah silai kenluh phal

United State of America-a Texas state-a campus law siam thar hnuaiah, university building-ah silai kenluh phal a ni a, classroom leh dorm-ahte pawh ken luh phal a ni.

Campus law thar hi August 1 aṭang khan hman ṭan a ni a, dan thar hman a nih hnuah Thawhṭanni khan college hrang hrangte chuan class an nei ṭan a ni. Mahse he dan thar hnuaiah hian silai neitu chu kum 21 a tling tur a ni a, campus-a silai keng tur chuan phalna a nei a ngai bawk ang.

Texas campus law thar hi gun advocacy group chuan an thlawp a, mahse hetihlai hian silai khuahkhirh duhtu pawl, student activist leh professor-te chuan an dodal nasa hle. He dan thar hi public university-te chuan an zawm vek dawn a, mahse private academic institution-te chuan an hman ve kher a ngai lo thung. Texas-a private university tam zawk chuan campus chhunga silai ken luh hi an khap a ni.

Tunhnaia Urban Policy Research and Analysis-in mipui ngaihdan a lakah, campus law thar siam hi mihang voter zingah 79%, Latino voter 66% leh mingo voter 47% ten an thlawp lo.

Joyce Foundation chuan America ramah hian kumtin silai hmanga pawikhawihna thlen vanga thi mi 100,000 chuang an awm ziah niin a tarlang.