Aleppo-a beihpui thlaknaah IS hruaitu thi

Islamic State (IS) firfiak pawl thupuangtu Abu Mohamed al-Adnani chu Syria-a Aleppo biala beihpui thlaknaah a thi.

Adnani thih thu hi IS website-ah Thawhlehni khan tarlan a ni a, Aleppo biala security force-te'n beihpui an thlaknaah a thi niin a sawi. IS hotu lu ber dawttu Adani hi firfiak pawl hruaitu ni rei thei ber zinga mi a ni. Website-ah hian a thih thu tarlan ni mah se, a thih dan kimchang erawh sawilan a ni lo.

US defence official chuan US sipaite chuan Adnani bitumin beihpui an thlak tih a sawi a, Thawhlehni khan al-Bab khuaa firfiakte motor an bomb thu an sawi. Mahse he motor an bomb-ah hian Adnani hi a chuang nge chuang lo erawh an tarlang tel lo.

Kum 2015 aṭang khan US-in IS hruaitu an chanchin hriatchian tuma a zawn mi pali zingah Abdani hi a tel a, a man thei hnenah lawmman dollar maktaduai nga pawh pek a lo phal tawh a ni.

Adnani hi kum eng emaw chen chu IS tana thupuangtu ber niin, an pawl thu pawimawh puangchhuaktu a ni a, internet lamah audio file pawh tichhuakin an mi leh sate chu pawikhawihna thlen turin a fuih fo ṭhin. Kumin kumtir lam pawh khan Muslim thla thianglim Ramadan laia pawikhawihna thlen tur te, khawthlang ram bei turte in a fuih a ni. A fuihna avang hian kumin Ramadan laiin kum dang zawng aiin firfiakte hian pawikhawihna an thlen nasa nia sawi a ni.

Middle East analyst Saad Jawad chuan Adnani thi hian IS pawlah nghawng a nei lian hle dawn niin a sawi a, "IS thupuangtu anga awm ni mah se, a takah chuan Syria-a IS hmun luah tam zawkah roreltu ber a ni. Syria mi a ni a, Idlib-a piang a ni" a ti. Adnani hi IS-te'n pawi an khawihna hmun tam takah a mawhphurtu ber a nih thu a sawi.

Kum 2000 khan Adnani hian Iraq-a al-Qaid hruaitu Abu Musab al-Zarqawi a thlawp thu alo puang thaw a, a hnuah man niin kum thum jail-ah a tang a, kum 2011 khan IS hotu lu ber Abu Bakr al-Baghdadi chuan Syria ramah a tir a ni.