Myanmar sorkar leh helpawlten 'peace talk' nei

Myanmar sorkar chuan an ram khawpui, Nay Pyi Taw-ah chibing helpawl 17-te chu inremna kawng zawngin inbiakna a neihpui. He meeting hi State Cousellor Aung San Suu Kyi leh UN Secretary General Ban Ki-moon-te'n an hawng a ni.

Sorkar-in peace talk a buatsaihah hian an ramchhunga helpawlte chu sawm vek an ni a, an zinga pawl 17 te an tel a ni. Peace talk-a tel zingah hian Karen, Kachin, Shan leh WA helpawlte pawh an tel.

Myanmar sorkar hmasa, sipai sorkar khan helpawl eng emaw zat chu inremna a siampui a, mahse rampum huapin inremna an la siampui thei lo. China ramri bula helpawl leh sipaite an la inbei reng a, mi tam takina an thihphah bakah hmun him lamah tlanchhe eng emaw zat an awm bawk.

Kumin March thlaa mipui thlan sorkar a din hnuah, Suu Kyi-i chuan an rama remna leh muanna a awm theihna tura hmalak chu an ngaih pawimawh ber tur a nih thu a lo sawi tawh a ni. Sorkar thar chuan helpawlte chuan ralthuamte chu dah a, federal system thar hnuaiah thuneihna insemna kawnga chanvo pawimawh zawk pek a duh a ni. Mahse parliament-a seat 25% neitu, sipai lam chuan sorkar ruahmanna siam hi an duh lo nia sawi a ni.