Yemen tualchhung buaina vangin mi sing chuan thi tawh

Yemen ram tual≠chhung buaina thleng vanga thi chu mi 10,000 an tling tawh niin United Nations chuan a sawi.

UN humanitarian co≠ordinator Jamie McGoldrick chuan thla 18 chhunga tualchhung indona thleng vanga thi zat, mi 6,000 vel nia an lo sawi tawh chu Yemen ram chhunga medical facility hrang hranga official information an dawn hnuah, mi 10,000 an chuang zawk niin a sawi a, hmun tam takah record mumal a awm loh avangin hei pawh hi ala punchhoh a rin thu a sawi bawk.

McGoldrick chuan record a nih hmain mi tam takin thah leh phum an ni tih sawiin, thi zinga tam zawk chu civil mi an nih thu a sawi.

Kum 2012-a President Ali Abdullah Saleh paihthlak a nih aṭang khan tualchhung buaina hi a chhuak a, thuneihna inchuhin sorkar sipai leh Houthi helte an inbei chhunzawm reng a ni. Saudi Arabia kaihhruai Arab ṭangrual ramte chuan kum 2015, March thla aṭang khan Yemen sorkar puiin helho lakah beihpui an thlak ṭan a ni.

Tualchhung indona thleng vang hian mi nuai hnih chuang zet chu ram dangah himna zawngin an tlanchhe tawh niin McGoldrick chuan a sawi a, an ram chhunga cheng mi makduai 26 zinga 14 vel chu ei leh in lamah chhawmdawl ngaiin an awm mek bawk tih a sawi.