Mexico-in ramri hungna man a pe vek ang : Donald Trump

US Republican president candidate Donald Trump chuan, President atana thlan tlin a nih chuan an rama dan loa pem lutte danna turin Mexico nen an inrina hung a tum thu a lo sawi tawh a, hemi hnu hian ramri hungna senso chu Mexico in a tum vek ang tiin a sawi leh.

Nilaini-a Arizona-a thu a sawinaah he thu hi sawichhuakin, Trump chuan ramri chu venhim tlat a tum thu te, dan loa an rama pemlutte chu thawnchhuah an nih tur thu a sawi. US hian document neiloa dan loa pem lut mi maktaduai 11 vel an awm mek nia chhut a ni. Trump chuan a khingpui, Democratic president candidate Hillary Clinton-i chu dan loa an rama pem lutte ngaihdam tumah a puh a, zalen taka ramri hawn pawh a thlawp a ni, a ti.

Arizona-a thu a sawi hma hian Donald Trump hi Mexico President Enrique Pena Nieto sawmna angin Mexico ramah zinin meeting an nei. Meeting an neih hnua chanchin thar lakhawmtute a kawmnaah, Pen Nieto chuan Trump-a thusawi ṭhenkhat chuan Mexico mipuite rilru a tihnat thute a hrilh niin a sawi a, hemi rual hian Trump chuan Mexico ram nen chuan inlaichinna ṭha tak siam a duh tih a sawi bawk.