Philippines President-in thubuai nei mai thei

Philippines President Rodrigo Duterte chu an rama dan loa, damdawi zuar leh ti ṭhinte laka beihpui thlaknaah mi 2,000 chuang an thi tawh nia sawi a nih avangin, international court-ah thubuai siamsak a ni mai thei niin human rights advocate-te chuan an sawi.

International Commission of Jurists (ICJ) regional director for Asia and Pacific Sam Zarifi chuan, damdawi zuar leh hmangsualte thah chhunzawm zel an nih chuan lawyer-te chuan President khinna tur finfiahna hrang hrangte an lakhawm dawn niin a sawi. Kum 1990 chho khan Philippines dictator Ferdidnd Marcos chu mi 9451 thihna chung≠changah US-ah thubuai siamsak a lo ni tawh a, US court chuan kum 1995 khan Marcos chu human rights palzutnaa mawhphurtu, mi ngaihsak, thah leh Filipino mi eng emaw chin hriat loha an awm chungchangah thiam loh a chantir a ni.

Zarifi chuan President Duterte hian danloa damdawi zuarte laka indo a puan chungchanga a
ṭawngkam hmanah, court-a khinna tur ṭawngkam a hmang fo tih a sawi. Heng zingah hian kar eng emaw liamtaa a sawi, "Ka thupek chu tihlum turin kap mai rawh, Human rights chungchang ka ngaihtuah lo a, hei hi drugs zuarte laka indona a ni a, kan beihlet a ngai a ni" tia a sawite pawh a tel.

Inthlan dawna a campaign-naah Duterte hian, dan loa damdawi zuarte laka beihpui thlaknaah mi 100,000 vel an thi dawn tih sawiin, Manila Bay-a sangha-te chu miruang an ei avangin an thau phah hle dawn a ni, tih te a lo sawi tawh a ni.

Duterte chuan an ramah damdawi hmang sual mi maktduia thum chuang an awm tih a sawi. July 1 aṭanga dan loa damdawi zuarte laka beih≠pui thlak a nih aṭang khan mi 600,000 chuang chu police-te kutah an inpe tawh a, jail hrang hrangte a tawt tawh hle a ni.