Israel leh Hamas-in tang inthleng chhunzawm

Israel leh Hamas chuan Gaza Strip-a inkahhai puanna atana inremna an lo siam tawh angin, Inrinni liam ta khan an mi tangte an inthleng leh. January 19, 2025 a inkahhai puan a nih aṭangin tang an inthleng ṭum rukna a ni.

Hamas chuan an mi hren mek zinga Israel mi pathum an chhuah a, chhuah an nih hma hian Gaza chhim lamah mipui pungkhawm hmaah an pho lang phawt a ni. Hemi hnu hian Red Cross motor-in phurh chhuah an ni a, Israel helicopter-in central Israel-a damdawi-inah phurh thlen niin, an hriselna dinhmunte enfiah an nih hnuah an chhungte nen an inhmu a ni. An mi chhuahte hi Iair Horn, 46; Sagui Dekel Chen, 36; leh Alexander Troufanov, 29 te an ni. Hemi hma hian Hamas hian an mi hren mi 21 an lo chhuah tawh.

Israel pawhin Inrinni vek khan an ram jail hrang hranga Palestinian tang zinga mi 369 a chhuah ve bawk. Tang chhuah zingah hian damchhung tang tura hrem eng emaw zat an tel. Israel hian a hmain Palestinian mi 700 chuang a chhuah ve tawh bawk. Inrinnia chhuah zinga a tam zawk hi Gaza-ah hruai niin, ṭhenkhat erawh West Bank lam panpui an ni thung. Palestinian mi chhuahte hi mi tam takin an lo hmuak a ni.

Hamas-in Inrinnia an chhuahte hi kum 2023, October 7-a Israel an beih ṭuma Kibbutz Nir Oz aṭanga an mante an ni. Hemi ṭum hian Horn unaupa pawh an man tel a, ani hi an la hreng mek a, inremna thawh khatnaah chuan chhuah tur zingah a tel lo nia sawi a ni. Hamas hian Israel an beih ṭum hian mi 251 manin Gaza Strip-ah an hruai a, an mi man zinga mi 73 chu Gaza-ah hian an la awm. Mahse heng zinga a zahve vel chu an thi tawh nia rin a ni. Tuna an la hren mekte hi mipa deuh vek niin, Israel sipaite pawh an tel.

Israel-in US aṭangin MK-84 bomb a dawng

US president Donald Trump-a'n president hmasa, Joe Biden-a'n US-in Israel hnena bomb a thawn tur a danna a hlih hnuah, Israel chuan US aṭangin bomb chak chi, MK-84 bomb an dawng tih nimin khan an sawi.

MK-84 hi unguided 2,000 pund bomb niin, concrete leh metal pawh ti chhe thei, bomb thawk na tak a ni. Joe Biden kaihhruai US sorkar khan he bomb hi Israel-in Gaza Strip-a beihpui a thlaknaah, mihring chen tamna bialah a hman an hlauh avangin Israel hnena thawnchhuah chhunzawm tur chu a dang a ni. Mahse Hamas in October 7, 2023-a Israel an beih hnuah khan hetiang bomb hi US chuan Israel hnenah hian a thawn hman tho a, mahse Gaza Strip-a Israel a chet nat viau tak avangin an thawn chhunzawm tur hi an dang ta a ni. US President atana lak luh a nih hnuah Donald Trump chuan he khuahkhirhna hi a rawn hlip nghal a, Israel hnenah thawn a ni leh thei ta a ni.