Pakistan court kawta bomb puakah mi 12 thi

Pakistan hmarthlang lam, Khyber-Pakhtunkhaw province-a Mardan khuaah nimin zing khan district court building pawnah bomb a puak a, mi 12 an thi a, mi dang 40 in hliam an tuar.

Bomb puak vanga thi te hi lawyer, politician leh civil mite an ni a, hliam tuarte hi damdawi-in panpui nghal an ni bawk.

Bomb tipuaktu hian a bomb pai a tihpuah hmain mipui awmkhawmna lamah hand grenade a vawm lut bawk nin senior police official chuan a sawi. He pawikhawihna thleng hi eng pawl mahin an tih niin an la chhal lo.

Nimin vek khan Peshawar khawpuiah thihchilh bomb pai mi paliten Kristian awmkhawmna hmun beih an tum bawk a, mahse security force-te'n lo dangin an kaphlum hman a ni.

Sipai thupuangtu Asim Bajwa chuan firfiak pali-te hi kahhlum an nih thu a sawi a, midang inhnamhnawih an awm leh awm loh dapchhuah hna an thawk chhunzawm nghal tih a sawi. Pawikhawihna thlen tumyute hi Pakistan Taliban nena inzawm, Jamaat-au-Ahrar pawl member nia sawi an ni a, sipaite nen an inbeihnaah hian civil mi pakhatin a thih phah a ni.