Turkey sorkarin court official 543 a ban

Turkey sorkar paih≠thlak tuma beihnaa inhnam≠hnawihte dap chhuah hna chhuina kal zelah, judge leh prosecutor 543 ban an ni leh. Heng mite nen hian July thlaa sorkar paithlak tuma inhnamhnawiha puh sorkar hnathawk ban hi mi 3,288 an tling tawh a ni.

President Recep Tayyip Erdogan chuan Ankara-a new judicial year hmannaah court official ban belh an nih thu hi a sawi a, hemi rual hian judiciary thuneihna chu tihlen a tum thu a sawi bawk.

Prime Minister Binali Yildirim chuan sorkar paithlak tuma beihnaah kha EU ramten an thlawp niin a sawi. Turkey sor≠kar chuan sipai chakna hmanga sorkar beihnaah hian US-a awm a, Islamic hruaitu Fethullah Gulen chu mawhphurtuah a puh a, mahse Gullen chuan an puhna hi a pha thung. Sorkar paithlak tuma beihnaah khan mi 270 chuang an thi a ni.

Turkey sorkar chuan sorkar beitute dapchhuah hna hi a thawk chhunzawm reng a, July 15 aṭang khan thu zawhfiah turin mi 35,000 chuang a hreng tawh a, an zinga mi 3,000 chuang hi judge leh prosecutor an ni.

Ankara-a thu a sawiah, President Erdogan chuan judge leh prosecutor-te ban belh an nih leh avang hian judiciary chu a chak loh phah dawn lo tih a sawi a, rorelna kenkawh kawngah a chak phah zawk dawn a ni, a ti.