Bangalesh-in Jamaat hruaitu khaihlum

Bangladesh chuan kum 1971-a Pakistan leh Bangladesh indo laia Bangladesh mite chunga pawikhawihna nasa tak thlena puha thiam loh a chantir tawh, Jamaat-e-Islami party hruiatu Mir Quasem Ali chu kar kalta Inrinni zan khan a khaihlum.

Mir Quasem Ali hian thi tura hremna pek a nihna chu ngaihtuah ṭha leh turin Supreme Court-ah a ngen a, mahse court chuan a ngenna hi a hnawlsak. Court-in a ngenna a hnawl hnuah Ali hian President hnenah zahngaihna lantir tura ngenna a thehluh duh loh avangin khaihlum a ni ta a ni.

Ali hi Bangladesh khawpui, Dhaka hmarlam km 40 vela hla, Gazipur-a Kashimpur Central Jail-ah dah a ni. Ali-a thlawptuten buaina an chawh chhuah venthawn thilah venhimna khauh taka kalpui a nih thu Gazipur police official, Russel Sheikh chuan sawiin, District chhung hmun hrang hrangah police 1,000 chuang duty tir an ni, a ti.

Bangladesh sorkar chuan independence war laia an ram mipuite chunga pawikhawihna thlentute chungchang ngaihtuah tur hian war crimes tribunal a din a, hei hi Jamaat thlawptu leh eptu party lian ber, Bangladesh Nationalist Party (BNP) chuan na takin an sawisel thung. War crimes tribunal din hi Bangladesh sorkarin politics lama a hmelmate a nuaibona tura a hmanrua niin an puh. Kum 2013 aṭang khan eptu hruaitu pangate chu indo laia an ram tana pawikhawihna thlentua puhin khaihlum an ni tawh.

Kum 2014 khan Ali hi Bangladesh leh Pakistan indo laia pawikhawihna tam tak thlenah puhin thiam loh chantir an ni a, an puhna zingah hian Bangladesh zalenna zualtu ṭhalai tam tak rubo leh thata puhna pawh a tel.

Mir Quasem Ali hi Inrinni zan dar 10.30 khan khaihlum a ni a, Pathianni zing dar 12.30 khan a ruang phurtu ambulance hian Kashimpur jail hi chhuahsain an khua, Manikganj panpui a ni a, fire service car, RAB leh police motor-in an zui. Manikganj khuaah hian vuina hu hman a nih hnuin zing dar 3.30 velah phum a ni. Vuina inkhawm hman lai hian police-te chuan Manikganj khuaah hian pawn lam mi kal an phal lo.