Uzbekistan President hlui vui liam

Uzbekistan President hlui, thluaka thisen zam chat vanga Zirtawpni zana thi, Islam Karimov chu nimin khan an khua Samarkand-ah vui liam a ni.

Kum 78 mi, Karimov-a ruang hi an ram khawpui, Tashkent aṭangin an khua Samarkand hi panpui a ni a, a ruang thlah leh hmuak hian khawpui pahnihah mi sang tel an pungkhawm. Preident hlui hi ram pumah ni thum chhung sun a ni ang.

Karimov hian kum 27 chhung ro arel a, a rorel chhung hian mihring dikna chanvo palzutah puhin sawisel pawh a tawk nasa hle. A sipaite pawh eptu chungah an che rawng hle a, mi tam tak an nghaisa hlum nia puh a ni bawk. Eptute chunga zahngaihna lantir duh loah puh ni thin mah se, President Karimov hi ram mipui tam zawkin an la thlawp reng a, a thih thu an hriat pawh hian mi tam takin an tuar hle.

President hlui vuina inkhawm hi Silk Road-a Registan Square-ah neih a ni a, tel an ṭhahnem hle. Inkhawm hi Prime Minister Shavkat Mirziyoyev pawhin a hmanpui a ni. Russia Prime Minister Dmitry Medvedev bakah Tajikistan leh Turkmenistan president-te pawh vuina inkhawmah hian an tel.