South Sudan-ah UN sipai 4,000 dah belh dawn

South Sudan chuan an ramah United Nations (UN) muanna sipai 4,000 dah luh belh a remti.

South Sudan hian UN sipai dah luh belh tumna hi a tirah a hnar a, mahse Pathianni khan an ram khawpui, Juba-ah President Salva Kirr leh UN Security Council ambassador-te'n meeting an nei a, a remti leh thei ta a ni. South Sudan-ah hian UN sipai 12,000 vel an awm sa a ni.

July thla khan President Kirr thlawptu leh eptu hruaitu, Riek Machar-a thlawptu sipaite intibuaiin an inbei a, tual≠chhung buaina chhuak vang hian civil mi tam tak an thi a, mi sang tel chu himna zawngin an tlan≠chhia. Buaina a chhuah hnu hian Riek Machar pawh ram dang≠ah a tlanchhe zui bawk.

Tualchhung buaina chhuakah hian civil mi bakah, South Sudan rama chhawmdawl hna thawka awmte chu sipaiten kut an thlak nasa hle a, hmeichhiate an pawngsual bakah mi an tihhlum lai chu mipuite an enluih tir bawk. Hei vang hian UN chuan mipuite himna ngaihtuahin muanna sipai dah luh belh a duh a ni. President Kirr chuan a tirah UN sipai dah luh chu an ram thuneihna palzutna a ni tiin a duh lo a, mahse UN lamin a nawr hnuah a remti thei ta chauh a ni.