Ramri-ah IS firfiak thenfai a ni tawh : Turkey PM

Turkey Prime Minister Binali Yildirim chuan Syria helpawlte puihnaa Turkey sipaiten Syria ramri-a Islamic State (IS) firfiak laka beihpui an thlak mek ah, ramri-a firfiak awmte chu thenfai an ni tawh niin a sawi.

Turkey hian August 24 aṭang khan Syria ramah hian beihpui a thlak a, Syria helpawlten an lo pui a ni. Beihpui thlakna atan hian Turkey sorkar chuan indo thlawhtheihna leh tank eng emaw zat a thawnlut a ni. Turkey sipaite hian IS firfiakten mamawh an chawk luhna kawngpui an dan sak a ni.

Hetihlai hian Syria sipaite chuan Aleppo biala hmun ṭhenkhat chu firfiakte kut aṭangin an la let tawh bawk.

Pathianni-a TV-a thu a sawiah, Turkey PM Yildiram chuan Syria nena an inrina, km 91-a thui chu firfiakte lak
aṭanga a him tawh thu sawiin, ramri aṭang hian IS firfiakte chu an insaseng vek tawh a ni, a ti. Turkey hian Syrian Kurdish grup, YPG chu firfiak pawlah a puang bawk a, mahse US kaihhruai
ṭangrual ramte chuan YPG hi an Syria hmarlama IS firfiak nen an inbeihnaah an pui thung a ni.

Syrian Observatory for Human Rights chuan Turkey leh Syria ramria thingtlang khaw eng emaw zat chu Turkey sipai leh Syria helpawlte hian an la let tawh tih a sawi.