Ethiopia Jail-ah kangmei vangin mi 23 thi

Ethiopia khawpui, Addis Ababa-a high-profile politician-te tanna, Qilinto tan-inah kangmei a chhuak a, mi 23 an thi.

Sorkar chuan Thawhṭanni khan thuchhuah siam≠in Qilinto tan-in hi kar kalta Inrinni zan khan a kang tih a sawi. Tang zinga mi 21 an thi a, thi te hi inchil buaina vanga thi leh boruak tlakchham vangte an ni. Kangmei chhuah hnuah jail aṭanga tlanchhuah tum mi pahnih chu kahhlum an ni bawk.

Ethiopia sorkar hian an ram khawpui hi a chhehvel, Oromia bialah zauh a tum a, hei hi duh loin nikum November thla aṭang khan Oromia-ah nawrh huaihawt ṭan a ni. Khawpui zauhna tur hian an thlai chinna ram tam tak nawrchhiat a ni dawn a, hei hi an duh lo a ni. Mipuiten an nawrna avangin he scheme hi tihtawp a ni a, mahse nawrh huaihawtte hian politics vanga mante chu chhuah zalen tur leh, zalenna zau tawk pek phutin sorkar an nawr chhunzawm a ni. Nawrh huaihawttu zinga mi 500 vel chu security force-ten an kaphlum tawh niin Human Rights Watch group chuan a sawi.

Amhara bialah mipui lungawi lo ten Welkait district pek let phutin nawrh an huaihawt bawk. He district hi Amhara bial≠a bet ṭhin a ni a, mahse kum 20 chuang liam taa khan Tigrayan bialah behtir a ni.

Ethiopia-a rorellai, Ethiopian People's Revolutionary Democratic Front hi party pali ṭang≠rual a ni a, mahse eptute chuan ṭangrual pawl hi Tigrayan People's Li≠beration Front kaihhruaina hnuaia awm niin an sawi.