Myanmar-ah lungawi lohna lantir

Myanmar sorkarin Rakhine state-a Rohingya Muslim leh Buddhist-te inkara buaina thleng ṭhin chinfel dan kawng ngaih≠tuah tura UN hotu hlui, Kofi Annan-a kaihhruai advisory commission a din chu duh lohin nimin khan mi tam takin kawng an zawh.

Ruahsur hnuaiah kawngzawh hi huaihawt a ni a, Buddhist puithiam≠te pawhin an zawm a ni. Kawngzawhte chuan member pakua awmna panel-a ramdang mi an tel chu an duh lo tih sawiin, ramdang mite chu ṭan lam nei saah an puh. Committee-ah hian Myanmar mi paruk leh ramdang mi pathum an tel.

Nawrh hi Arakan Na≠tional Party (ANP) huai≠hawt a ni a, Rohingya leh Buddhist inkar buaina chinfel dan ngaihtuahtu zinga ramdang mi telh chu sawisel≠in, ramdang mite hian an bial chhunga buaina thlen dan a chin chhuakin an hre lo niin an sawi. Tual≠chhung thila ramdang mi inrawlh chu an remti dawn lo tih an sawi bawk.

Kofi Annan hian ni hnih cham turin nimin khan Rakhine state hi a thleng a, state khawpui Sittwe-ah Rohingya leh Rakhine-a Buddhist aiawhte a kawm ang. Mipui lungawi lo te hian Annan-a chuanna convoy chu zuiin, government building kawtah nawrh an huaihawt chhunzawm a ni.

Rakhine state-ah hian Buddhist leh Rohingya muslim-te inkarah buaina a chhuak fo a, kum 2012-a buaina chhuakah mi 100 chuang an thi a, Rohingya mi tam tak chuan an in leh lo an tlanchhiatsan a, an zinga mi 125,000 vel chu buk-ah an la khawsa mek a ni. Rohingya Muslim-te hi zalen takin an insawn kual thei lo a, an hnathawh theih chin pawh bithliahsak an nih bakah Myanmar khua leh tui nihna pawh pek an ni lo. Hei vang hian mi tam tak chu ramdangah lawng hmangin an tlanchhia a ni.

Kofi Annan-a kaihhruai committee hi state counselor leh foreign minister, Aung San Suu Kyi-in thla hmasa khan a din a ni.