Naupang mtd 50-ten an chenna in tlansan

UN children agency, UNICEF chuan khawvel ram hrang hrangah ṭam leh indona thleng vangin naupang maktaduai 50 chuan an in leh lo an tlanchhiatsan niin a tarlang.

Naupang maktaduai 50 zinga maktaduai 28-te hi tualchhung indona thleng vanga tlanchhia an ni a, tam tak chuan dinhmun ṭha zawk beiseiin hmun dang an pan bawk niin a sawi.

UNICEF report chuan kum 10 liamta chhungin naupang raltlan awm zat hi a leta tamin an pung niin a tarlang. Sorkar hrang hrangten hma an la thuai lo a nih chuan an la punbelh zel a rinawm thu a sawi bawk. Indona emaw, ṭam vang leh sik leh sa inthlak danglam vang emaw pawh ni se, mawhphurhna nei lo naupangte chuan nasa takin an tawrh phah a ni, a ti.

Thawhlehnia report a tihchhuahah, UNICEF chuan raltlan naupangte chu naupang an nihna a bo chuang lo a, hei vang hian enkawlna pawh naupang pangngai angte bawkin an dawng tur a ni a, lehkha pawh zirtir an ni tur a ni, tiin a sawi.