Trump hi US President turin a qualify lo : Clinton

Kumin November thla-a US President thlanna neih tura Democratic party candidate, Hillary Clinton-i chuan Republican party candidate Donald Trump-a chu US president ni turin a qualify lo, a ti.

Donald Trump-a policy hrang hrangte chu sawiselin, policy siam tura thiamna a nei lo a ni, ti. Hei bakah hian America ram tana Trump-a hmathlir neihte chu a hlauhawm a, inṭhendarhna tur policy a neihte chu ramchhung leh rampawn lama America mite dinhmun a tiderthawng niin a sawi bawk.

Clinton-i chuan, "Trump hian IS firfiakte beihletna tur ruahmanna engmah a nei lo a, hetilai hian US sipaite chu a sawisel fo thung a ni. Kan ram himnaleh zah-awmna humhim tura beitu, kan sipaite chu Trump-a campaign hian a nuihzatbur fo a ni" tiin, hetiang mi hi US ram hotu lu ber turin a tlak lo, a ti.

Hetihlai hian Donald Trump chuan President atana thlan tlin a nih chuan a hna a zawm ni hmasa ber chu sorkar hmasa policy hrang hrangte ṭhiatin a buai hle dawn tih a sawi. North Carolina rally-a thu a sawiah, Trump chuan Presient Barack Obama-a policy siam hlauhawm tak takte chu a ṭhiat vek dawn tih a sawi a, heng zingah hian Syrian refugee awmna ngaihtuahsak tumna tihkhawtlai te, Obama care tihtawp te, Obama thupek tihchhuah tawh nuaibo bakah, ramri daidanna tur bang siam hna pawh ṭan turin hma a la dawn tih a sawi. Congress hnenah Obamacare thlakna tur bill siam tura a ngen tur thu a sawi bawk.