UNSC-in missile kahchhuah a dem

United Nations Security Council chuan North Korea-in Thawhṭannia ballistic missile pathum a kahchhuah chu a dem thu a sawi.

UNSC chuan Security Council resolution palzuta NKorea-in missile a kap-chhuak nawn leh chu a dem thu sawiin, he thil hian a ṭhenawm ramte nena an inkar boruak pawh a tichhe zual a ni, a ti.

Aguust 24 khan NKorea hian khawchhak lam tuipuiah tuihnuai lawng aṭang-in missile a lo kapchhuak tawh bawk. UNSC chuan Korean Peninsula-a boruak ṭha a awm chu an duh thu sawiin, member ramte chuan boruak awm dan chu an thlithlai reng dawn tih a sawi.