Rousseff-in presidential palace a chhuahsan ta

Brazil President aṭanga ban tak, Dilma Rousseff-i chuan an ram khawpui, Brasilia-a President official residence, Alvorada Palace chu a chhuahsan ta.

Rousseff-i thlawptu leh a thawhpui eng emaw zat chu Alvorada Palace pawnah pungkhawmin, president hlui hi pangpar nen an thlah a ni.

Kar kalta kha an ram budget chungchang dik lo taka tidanglama puh a nih vangin Senate chuan Rousseff-i president a nihna aṭangin a ban a ni. An puhna chungchangah hian tih dik lo engmah a nei lo nia sawiin, Rousseff-i chuan ban a nih dan chu dik lo taka kalpui a ni, a ti. Senate thutlukna siam chungchang hi Supreme Court-ah a appeal a, mahse a hlawhtlin a beiseiawm lo hle.

President hlui hian Alvorada Palace aṭang hian an khua, chhim lama Porto Alegre khua a pan nghal a, airport-ah mi tam takin an lo hmuak bawk. He khua hi politics lama bul a ṭanna niin, Brasilia-a President hlui Luiz Inacio Lula da Silva hnuaia a thawh hma chuan a cheng ṭhin. A fanu leh a tute pawh Porto Alegre-ah hian an cheng.