Egypt President bang turin phût

Egypt sorkar laka lungawilote chu Pathianni khan  Giza-ah kawng an zawh a, kawng zawhte an lungawi lohna thu ziahna banner te kengin, Egypt president Abdel Fatah el-Sisi chu bang turin an phût bawk.

Pathiannia Giza-a kawng zawh a nih hma hian Egypt khawpui hrang hrangah security force leh police-te chu dah lawk an ni a, mahse heti chung hian Giza-ah chuan sorkar laka lungawilote chuan kawng an zawh lui tho a ni. Nikum September 20 khan army contractor hlui Mohamed Ali chu Egypt aṭanga hnawhchhuah a ni a, Ali hi Egypt president thawhpui hlui a ni. An rama eirukna nasa tak awm thu chu sawi chhuakin, hemi ni hian Egypt ramah an President duh lohna, anti-Sisi protest chu an huaihawt nghal a, hemi hnu hian ṭum tam tak lungawi lohna hi an lantir chhunzawm a ni. 

Ali hian army contract hnuaiah Egypt-a construction industry-ah kum 15 lai a thawh thu sawi chhuakin, villa panga an saknaah an ram president Sisi chu a tel ve tih a sawi chhuak a, military camp-ah Sisi chuan palace a neih thute pawh a sawi chhuak bawk. 

Eiruknaa President a inhnamhnawih dan sawi chhuah a nih champhaah bang tura phutin lungawi lohna hi lantir a ni leh ta a ni. Mipui kawng zawhte hian  police motor-te halin, security force-te chu lungin an tawng bawk. Eirukna avangin an ram economy in a chhiatpui nasa hle tih sawiin, President chu bang turin an phut. 

Nikum aṭanga President laka lungawi lohna lantira mante hi mi 1000 chuang an ni tawh tih human rights group pakhat chuan a tarlang a, an rama eirukna leh kawng hrang hranga hlemhletna a awm avangin kum 2011 aṭang tawh khan sorkar lakah lungawi lohna vawi tam tak lan tir a lo ni tawh a ni.