Britain-in dan bawhchhiate hremna na zawk siam

Britain sorkar chuan Covid-19 hri leng darh tur venna atan dan bawhchhiate hremna na zawk pekna tur dan siam tharin, dan zawm lote chu British pound 10,000 theng chawitir theih an ni. 

Sorkarin Covid-19 vanga in lama tawmim tura a tih zingah dan zawm duh lo a, pawnchhuak lui an awm reng a, hei vang hian sorkar chuan sum tam tham tak chawi tir an nih theihna tur dan a siam ta a ni. He dan thar hi September 28 aṭanga hman ṭan a ni ang. 

Dan siam tharah hian coronavirus kai, symptom neite chu mahnia cheng an nih chuan ni 10 chhung inkhung hrang tura tih a ni. Hri kai, midang nena chengte chu ni 14 chhung inkhung hrang tura tih an ni bawk. Pawn lamah mi paruk aia tam punkhawm khap a ni bawk a ni. 

Prime minister Boris Johnson chuan dan zawm duh lote chu sum chawitir an ni zel tawh dawn tih sawiin, a vawi  khatnaah pound 1,000 chawitir niin, hemi hnuah dan an bawhchhe chhunzawm leh a nih chuan pound 10,000 chawitir an ni ang. Hei bakah hian hnathawka chhawrtuten an hnathawk, inkhung  hrang tura tihte hna thawk tura an ti lui a nih chuan thubuai siamsak an ni bawk ang. 

Britain-ah hian Covid-19 hri kai mi 3,94,257 an awm tawh a, heng zinga mi 41,777 chuan hri an thihpui tawh a ni.