Annan-a'n remna siam tura thawh a tiam

Myanmar sorkarin Rakhine state-a Buddhist leh Rohingya Muslim-te inkara buaina chinfel dan kawng ngaihtuah tura committee a din hotu, UN hotu hlui Koffi Annan-a chuan tualchhung mipuite aṭangin dodalna tawk mah se theihtawp chhuah a tum tih a sawi.

Rakhine state mipuite chuan sorkarin commission a dina ramdang mi telh an ni chu duh loin, Koffi Annan-an an state a thlen pawhin lungawi lohna an lantir a ni. Ram dang mite chuan an dinhmun dik tak hrechiang loah puhin, ṭan lam nei saah an puh.

Koffi Annan hian Rakhine state hruaitute a kawm bakah, tualchhung buaina thleng vanga tlanchhia, Rohingya Muslim-te chenna camp a tlawh bawk. Mahse Rakhien biala political group lian ber, Arakan National Party chuan Annan hi an hmu duh lo.

Myanmar-a Rohingya Muslim-te hi an dinhmun a chhe hle a, Myanmar sorkar chuan khua leh tui nihna a pe duh lo a, an thiltihna kawngah pawh khuahkhirhna siamsak an ni bawk. Tualchhung buaina chhuak vanga tlanchhia, Rohingya mi tam tak hi an khaw lamah la kir ngam loin, puanin kaihah an la khawsa an ni.

Kar hmasa khan UN Secretary General Ban Ki-moon chuan Myanmar sorkar chu Rohingya hnam chu khua leh tui nihna pe turin a ngen a, an dikna chanvo neihte zahsak turin a ngen bawk.