Trump-a'n Mexico a tlawh hnuah fin. minister a bang

US Republican presidential candidate, Donald Trump-a'n Mexico a tlawh hnuah, Mexico finance minister Luis Videgaray chu minister a nihna aṭangin a bang.

Donald Trump hian kar kalta khan Mexico hi a tlawh a, President Enrique Peno Nieto nen meeting an nie. Mahse Trump-a'n an ram a tlawh hi Mexico mipuite chuan chanchinbu leh social media lamah nasa takin an sawisel a, hei vang hian Trump leh President Nieto-te meeting huaihawttu ber, Videgaray hian banna a thehlut ta a ni.

Finance ministry thupuangtu chuan Videgaray hian hna dang a chelh dawn lo tih a sawi a, amah thlaktu atan hian kum 2011 leh 2012 a finance minister lo ni tawh, Minister of Social Development ni lai, Jose Antonio Meade chu ruat nghal a ni.

Trump hian a campaign-naah US-a Mexico pem lutte chu nasa takin a sawisel a, Mexican pemlutte chu pawikhawihtu leh pawngsualtu ti tein a ko a ni. President atana thlan tlin a nih chuan dan loa Mexico aṭanga US-a pem lut ṭhinte danna turin ramri hungna bang siam a tum thu a sawi bawk.

Videgaray hi President Nieto-a thawhpui hnai tak zinga mi a ni a, kum 2012 inthlanah pawh khan campaign hlawhtling takin a neihpui a ni. Mahse Trump-a'n an ram a tlawh chung≠changah a lakah mipui an lungawi lo hle a ni.