Obama leh Duterte-te inhmu

Phillipines President Rodrigo Duterte-a'n US President Barack Obama chu ṭawngkam mawi lo taka a koh avangin Obama meeting an neih tur pawh a ṭhulh phah a, mahse hemi hnu hian holding room-ah hruaitu pahnihte hi an inhmu zawk.

Obama leh Duterte hi Laos khawpui, Vientiane-ah ASEAN Summit hmangin an awm mek a, Thawhlehni khan official meeting nei tur an ni a, mahse Duterte ṭawngkam avang hian meeting hi ṭhulh a ni ta a ni.

Summit hmanga ram hruaitu kalte chu Nilaini zan khan zanriah kilna tur hmun an pan hmain holding room-ah an awm khawm a, hetah hian hruaitu pahnihte hi a chhuak hnuhnungah ṭangin hun rei vak lo an ti ti dun a ni.

Philippines Foreign Secretary Pefecto Yasay chuan hruaitu pahnihte inhmuh chungchang hi sawiin, eng chena rei nge an ti ti dun erawh a hriat loh thu a sawi. US leh Philippines ram chu hun rei tak aṭanga inzawmna ṭha tak nei tawh an ni a, hei hi hruaitu pahnihte pawh hian an hria a ni tih sawiin, holding room-ah ṭha taka an inkawm thei chu lawmawm a tih thu a sawi.