Covid-19 chi hran hmuh vangin UK aṭanga luh khap ram an pung zel

United Kingdom-ah Covid-19 hri chi hran hmuh a nih avangin Europe ram bakah ram dang zingah UK aṭanga an rama luh khap an pung zel. 

UK-a coronavirus hri thar hmuh hi a tira leng ai chuan hlauhawm lo zawk niin sawi mah se, a hmaa leng aiin 70% in kai a awlsamin a darh chak zawk nia sawi a ni thung. Mahse he hri thar tan pawh hian Covid vaccine chu a hman theih dawn tho a ni. 

He hri thar hmuh hi VUI-202012/01 (the first Variant Under Investigation in December 2020) tih a ni a, September thla laihawl vel aṭang khan London leh Kent velah hmuh ṭan nia sawi a ni, a darh chak hle a ni. December 9 thleng kha London-ah chuan hri kai hmkuh zingah  62% chu he virus chi hran kai hi nia sawi an ni. 

Public Health England hotu, Susan Hopkins chuan December 18 khan virur chi hran chungchangah an thil hmuhchhuahte chu sorkar an hriattir tih a sawi a, hemi ni vek hian UK sorkar pawhin World Health Organisation (WHO) a hriattir zui ve nghal bawk. 

UK chief scientific adviser Patrick Vallance chuan virus chi thar chu ram dangah pawh a awm ve ngei a rinawm thu a sawi a, hemi rual hian UK aṭanga rawn inṭan pawh a ni maithei a ni, a ti. Scientist-te chuan hri chi tharah hian a tira hri leng aia a danglamna 23 a awm niin an sawi. 

Denmark ram chuan nimin aṭang khan UK-a thlawhtheihna service chu a titawp a, Netherlands pawhin January 1 thleng UK aṭanga khualzin phur thlawhtheihna luh a khap dawn. Thlawhtheihna bakah UK aṭanga lawng hmanga lut turte pawh an dang rih dawn a, bungraw phur chauh luh an phal dawn a ni. 

France chuan Pathianni zanlai aṭang khan UK-a travel link zawng zawng a titawp a, Germany pawhin Pathianni aṭang vek khan UK aṭanga khualzin phur thlawhtheihna luh a khap bawk. 

Ireland chuan Pathianni zanlai aṭangin darkar 48 chhung Britain aṭanga thlawhtheihna luh a kap a, an ram mipuite hriselna dinhmun an ngaihtuah avangin Britain aṭangin thlawhtheihna leh lawng hmangin an ramah tumah lut rih lo turin an ngen. 

Belgium pawhin venthawn thilah nizan zanlai thleng khan UK aṭangin thlawhtheihna leh rel luh a khap bawk. Italy chuan nakkum January 6 thleng UK aṭanga thlawhtheihna luh a khap a, Turkey chuan UK bakah Switzerland aṭanga flight luh a khap tawh bawk. 

Austria sorkar chuan khapna la tichhuak chiah loh mah se UK aṭanga thlawhtheihna luh a remti dawn hrih lo tih a sawi a, Bulgaria chuan January 31 thleng UK aṭanga thlawhtheihna thlawh luh a khap tawh bawk a ni. 

Europe ramte bakah Canada pawhin Pathianni zanlai aṭang khan darkar 72 chhung UK aṭanga passenger flight luh a khap. Pathiannia UK aṭanga Canada lut hmante chu screening neih sak vek niin, inkhunghran tir an ni bawk. 

Hong Kong, Israel, Iran, Croatia, Argen­tina, Chile, Morroco leh Kuwati pawhin UK laka khuahkhirhna hi an siam tawh a, Saudia Arabia chuan kar khat chhung atan international flight a titawp bawk.

Covid-19 hri chi thar hmuh a nih avanga ram hrang hrangten UK khuah­khirhna tur an siam chhoh tak avangin nimin khan prime minister Boris Johnson chuan emergency meeting a ko. PM thupuangtu chuan Europe ramte bakah ram dang eng emaw zatin UK aṭanga thlawhtheihna luh khapna an siam chhoh zel avangin hemi chung chang leh, an rama coronavirus chi hran leng mek chungchang ngaihtuah turin meeting hi PM hian a ko tih a sawi.