Biden-a'n justice nominee siam tum chungchangah President Donald Trump na takin sawisel

November thlaa US President thlanna neih tura Democratic presidential candidate Joe Biden chuan a khingpui tur, President Donald Trump-a'n kar liam ta Zirtawpnia thi, Supreme Court-a liberal justice Ruth Bader Ginsburg hmun ruak  hnawh khattu chu ruat fel thuai a tum chungchang chu na takin a sawisel. 

US Supreme Court-a liberal wing lama mi, Justice  Ruth Bader Ginsburg hi kum 87 mi niin Zirtawpni khan a thi a ni. President Trump chuan a hmun  ruak hi tikhawtlai loa ruat fel thuai  tum a nih thu leh, hmeichhia bawk a nominate tur thu a sawi. President thil tum hi Democrats lam chuan an sawisel nasa hle a, inthlan hmabak an nih laia justice thar tur ruat nghal a tum hi conservative wing lam tihchak tumna niin an puh. Vice president hlui Biden chuan President Trump chu justice ruat a tum chungchangah hian a political power dik lo taka hmangah a puh bawk a ni. 

Democrats presidential candidate Joe Biden chuan November thlaa inthlan an hmachhawn a ngaih tawh avangin President Trump-a'n Supreme Court justice thar tura a nominate pawh pawm lo turin Senate a ngen. President rawtna hi Senate in a pawm a nih chuan, Supreme Court-a  justice zingah paruk chu conservative wing lam niin, Democrats President-ten an nominate, liberal wing lamah pathum chauh an awm tawh dawn a, hei hian America dan leh dun thlengin a nghawng thui hle rin a ni bawk.  

Biden chuan November 3-a inthlan an neihah hnehna a chang a nih chuan, amah zawk chuan Supreme Court justice chu a ruat tur zawk a ni, a ti. Thlan tlin a nih chuan an ram chanchina a vawikhatna turin justice atan hian African-American hmeichhia ruat a tiam bawk. 

Republican senator John Barrasso chuan Democrats hi bei letin, an party hi White House leh Senate-a rorellai ni se chuan rang takin Supreme Court member tur hi an tifel nghal ang, a ti. 

Hei hi kum 2016 inthlana Trump-a'n a hneh tak, Democrat Hillary Clinton chuan chhang let ve nghalin, Barraso ngaihdan leh thlir dan chu pawm tlak loh tiin a sawi. Secretary of state hlui Clinton chuan, an boruak tawn mek chu an ram tana  thil ṭha lo leh hlauhawm tak a ni, a ti.  

Joe Biden-a'n inthlan kuma hmanhmawh taka Supreme Court justice hmun ruak hnawh khah tum a sawisel hnuah, kum 2016-a justice ruat chungchanga a thu lo sawi tawh chu vawrh thar leh niin, a thusawi pahnih hi a inkalh nia puh let a ni. 

Kum 2016 March thla khan Biden chuan Supreme Court justice ruat tur chungchang tihkhawtlai luiah Republican hi sawselin, hmun ruak a awm velah a hnawhkhattu tur ruat nghal chu President tih tur a nih thu a lo sawi a ni. Inthlan kum a nih vang maia Republican senator-ten nomination an pawm duh loh chu mak a tih thu leh, pawi a tih thute a lo sawilang tawh bawk. 

Joe Biden hian kum 2016-a hetihlaia US president Barrack Obama'n justice Antonin Scalia a thih avanga a hmun ruak hnawh  khat tura Merrick Garland a ruat, Repubican senator-ten Senate-a an kaltlangpui duh loh ṭumin he thu hi a sawi a ni. 

Seat pakua awmna, Supreme Court-ah hian  Ruth Bader Ginsburg  a thih tak avangin justice pariat an awm mek. Chief Justice chu John Roberts niin,  kum 2005 aṭang khan he dinhmun hi a chelh a ni. 

Justice pariat zingah Republican president-te nominate hi panga awmin, Democrats president nominate mi pathum an awm mek bawk.

Donald Trump hian President a nih hnuah justice pahnih a ruat tawh a, kum 2017-ah Neil Gorsuch leh kum 2018-ah Brett Kavanaugh-te a lo ruat tawh a ni. 

Senate-ah hian Republican lamin majority an neih avangin Republican President-in a nominate hi tling tura ngaih sa a ni. 

President Trump chuan justice thar atan hian hmeichhia bawk nominate a tum thu a sawi avangin, a nominee tura rin kai zingah hian  hming langsar zual pathum an awm. Chungte chu Amy Coney Barrett, Babara Lagoa leh Allison Jones Rushing-te an ni.