Thailand seafood market-ah hri darh

Thailand khawpui, Bangkok bula seafood market-ah Covid-19 hri a darh nasa a, hei vang hian sorkar chuan he hmun nena inkaihhnawihna nei mi sang telte test runpui a neihsak. 

Covid-19 hri hmuh a nih hnuah China tih lohah chuan Thailand hi hri kai hmuhna hmasa ber ram a ni a, mahse hri hi a darh nasa lo thung.  Tun hnaiah seafood market aṭang hian hri kai hi nasa takin an rawn pung ta thung a ni. 

Kar liam ta Ningani khan Thailand rama seafood market lian ber, Mahaci market-ah hmeichhe pakhat, kum 67 mi chuan Covid-19 a kai tih hriat a ni a, a tukah mi paliin hri an kai tih hriat belh leh niin, Pathianni-ah chuan he hmuna hri kai hmuh chhuah hi 689 ah an kai chho a ni. Nimin khan hri kai hi mi 360 hmuh belh leh an ni bawk. 

Public health ministry chuan hri kai hmuh chhuah thar zinga a tam ber hi seafood market-a thawk, Myanmar aṭanga lutte an nih thu a sawi. Market-a thawktu tam zawkte awmna, Samut Sakhon chu lockdown nghal a ni a, nakkum January 3 thleng a awh ang. 

Seafood market-a hri a darh tih hriat a nih hnuah thuneitute chuan he hmuna  hnathawktute chu an in chhuahsan lo turin a ti a, test runpui a neihpui nghal a ni. Hnathawkte hi an inah ei tur leh an mamawh dangte a thlawna pek an ni.