Parliament committee hmaa dawt sawi vangin Singapore eptu hruaitu thiam loh chantir

Singapore court chuan an rama eptu hruaitu, Workers' Party hotu Pritam Singh chu Parliament committee hmaa dawt a sawi vangin thiam loh a chantir. Kum thum chhung lungin tantir a, USD 7,440 chawitir bakah an ram inthlanpui lo awm tura chuh thei lo tura hrem theih a ni ang.

Kum 48 mi, Pritam Singh hi Workers' Party secretary-general a ni a, thiam loh chantir a nihna hi kum 2021-a an party MP pakhat, Raeesah Khan dawtsawi kaihhnawihah a ni. Khan hian Parliament-ah mipat hmeichhiat lama khawih tuartu, hmeichhia pakhat chungah police-te chet dan mawi lo tak a hmu niin a sawi a, a hnuah a thusawi hi a dik lo niin a sawi leh. Hei vang hian Khan hi USD 26,000 chawitir niin, party leh Parliament member a nihna aṭangin a bang zui bawk.

Nikum khan parliamentary committee chuan hemi chungchang hi chhuiin, Khan hian an party hruaitu, Singh pawh telin a thu lo sawi tawh chu a dik lo a ni tih an hriat hnuah pawh a dawt sawiah ṭang chhunzawm zel turin an ti niin a sawi. Singh chuan a puhna hi pha mah se parliamentary committee chuan Singh hian dawt a sawi ngei niin an ngai a, a case hi public prosecutor kutah an hlan zui ta a ni. Nimin khan deputy principal district judge Luke Tan chuan thiam loh chantir a nih thu hi a puang ta a ni.