Covid-19 relief bill siam turin inrem
US Congress-a dollar tluklehdingawn 900 dawn Covid-19 relief bill siamna turin Republican leh Democrats-te chu an inrem thei ta.
He relief bill hi Congress-ah nimin khan ngaihtuahin, vote lak a ni ang. Pawm a nih chuan kumin March thlaa aid bill USD trillion 2.3 pass a nih hnuah US chanchina relief bill pass lian ber a ni ang.
US hi khawvela Covid-19 hri leng tuar nasa ber ram ni mekin, hri kai leh thihpui tamna ber ram a ni a, hri kai hi an la pung chak hle bawk.
Chhawmdawlna tur siam hi pawm a nih chuan, hripui leng vanga hna chante chhawmdawlna turin kar khatah USD 300 pek niin, American mi tam zawkin USD 600 an dawng bawk ang a, hei bakah hian sumdawnna kawnga harsatna tawkte tan hamṭhatna tur siamsak niin, school, healthcare provider leh mi in luah, hnawhchhuah mai hmabaka awm mekte ṭanpuina tur pawh siam a ni ang.
Senate majority leader Mitch McConnel chuan America mipuite chhanchhuahna tur lian tham tak a ni dawn tih sawiin, America mi dinhmun harsa leh khirh taka ding mekte ṭanpuina tur a ni, a ti.