Nepal President-in Parliament a ṭhiat Nakkum April-May-ah inthlang dawn

Nepal president Bidya Devi Bhadari chuan prime minister KP Sharma Oli thurawn angin inthlanpui an neihna tur atan Pathianni khan Parliament a ṭhiat. 

Rashtrapati Bhawan thuchhuah chuan, President chuan an ram Constitution Artile 85 leh Article 76,clause 1 leh 7 behchhanin Parliament hi a ṭhiat ta tih a sawi. President chuan nakkum April-May-ah mid-term general election neih a nih tur thu a puang nghal a, inthlan thawh khatna hi April 30-ah neiin, May 19-ah inthlan thawh hnihna an nei ang. 

PM Oli-a'n emergency meeting a kohah inthlan neih tur chungchang hi an rel nia sawi a ni a, he hunah hian council of minister-te an tel a ni. Meeting zawhah  an thurel hi President hi hrilhin, Parliament ṭhiat turin thurawn pek nghal a ni. 

Hetih lai hian rorellai, Nepal Communist Party thupuangtu, Narayankaji Shrestha chuan PM Oli thutlukna siam hi a sawisel. "He thutlukna hi hmanhmawh takin an siam a, meeting-ah hian minister pawh an kim lo a ni. Hei hi demo­cracy kalphung a ni lo," a ti. 

Parliament lower house, member 275 awmna House of Representatives inthlan hi kum 2017 khan neih a ni. Upper house hi National Assembly tih a ni. Rorellai party, NCP chhungah hian thla eng emaw zat chu innghir­nghona a awm tawh a, lamṭang pawl pahnih awmin pakhat chu PM leh party chairman Oli-a hote an ni a, a lehlamah party executive chair leh premier hlui, Prachanda hote an awm ve bawk.