Interpol-in Covid vaccine chung changah thil sual tihna thlen tam phah an ring

Interpol chief Juergen Stock chuan Covid-19 vaccine peihfel a ni chho zel a, heng vaccine-te thawnchhuah leh semdarhna kawngah pawikhawihna leh thil sual tihna a  thlen tam phah ngei a rin thu a sawi. 

Stock chuan rukrute an rawn pung chho ang a, warehouse-a vaccine dah ruk tum leh, a thawndarhtute lo bei tawk pawh an awm chho ngei dawn a ni, a ti. Hei bakah hian Covid-19 vaccine kaihhnawihah hian eirukna, hlemhletna thleng pawh eng emaw zat a awm a rin thu a sawi bawk. 

US company Pfizer leh Germany company BioNTech siam Covid vaccine chu ram 16 in hman turin an pawm tawh a, ram ṭhenkhatah chuan he vaccine hi pekchhuah ṭan a ni tawh. Hetih lai hian heng ramte hian vaccine hi an dose duh ang zat an la dawng thei rih hlawm lo a ni. 

Juergen Stock chuan vaccine mamawhna leh inchuhna a nasa chho zel a, hei vang hian vaccine rang zawk an hmuh theihna turin hmun tam takah chuan thil dik tawk loa tih duhna a awm chho ngei ang, a ti. Hemi ruala vaccine semdarh tur lo tihbuai a, lo tihchhiat sak tum pawn an awm a hlauhthawnawm hle bawk.

Germany chuan vaccine phurtute chu police-te venhimna a pe dawn a, hei bakah hian vaccine dahṭhatna hmunte hi a puangzar dawn lo bawk a ni.