NKorea-in Mount Kumgang resort cheiṭha dawn

North Korea chuan Mount Kumgang tourist complex chu cheiṭhain, international resort-ah siam chhoh a tum. He resort hi Korea ram pahnihten economy lama an thawhdunna lantirna pawimawh tak a ni ṭhin a, South Korea-a Hyundai Asan chei niin, NKorea rama tlang mawi leh hmuhnawm ber zinga mi, khualzin tam tak hiptu a ni ṭhin.

North Korea ram hotu lu ber, Kim Jong-un chuan nikuma SKorea nena inkar boruak a chhiat zual hnuah, he resort-a building sakte chu a ṭha tawk loin, puanin kaih ang vel lekah an ngaih sak niin a sawi a, hei vang hian SKorea lam building sakte chu tichhe vek turin thupek a tichhuak a ni. 

Korean Central News Agen­cy (KCNA) chuan Pa­thianni khan premiere Kim Tok Hun chuan resort hi tlawhin, NKorea lam duhdan ang takin tourist area-te chu an chei ṭhat a ngai tih a sawi a, khawvelin a awh tur khawp resort-ah an chantir dawn tih a sawi a ni, a ti. He hmun pawh hi hawn leh thuai tum a ni tih a sawi bawk. 

Mount Kumgang complex hi  ram pahnih inrina, demilitarised zone (DMZ) hmarlam, North Korea lam china awm a ni a,  inter-Korean project lian ber zinga mi niin, kumtinin khualzin tlawhtu tam tak an awm ṭhin. 

Khualzinte thlenna tur hian Mount Kumgang tlang bulṭhutah hian in te eng emaw zat siam a ni. Mahse kum 2008-a NKorea sipaiin SKorea khualzin pakhat a kahhlum aṭang khan SKorea lam chuan he hmuna zin hi a lo khap tawh a ni.